Jurnalist · Fotoreportyor · Redaktor

Məhəmməd Türkmən

2011-ci ildən jurnalistikada. Cəbhə və böhran bölgələrindən reportajlar, maliyyə piramidaları və kibercinayətkarlıq üzrə araşdırmalar, sahə fotoqrafiyası.

Araşdırmalarım Əlaqə saxlayın

Aşağı sürüşdürün

4000+ Hazırlanmış reportaj
15+ İl sahə təcrübəsi
300+ Haqqımda yazılan yazı
50+ İştirak etdiyim təlim

Haqqımda

Sahədən yazan jurnalist

Reportaj mənim üçün masa arxasında deyil, hadisənin baş verdiyi yerdə başlayır.

Doğum: 17 oktyabr 1990, Marı, Türkmənistan
Yaşayır: Bakı, Azərbaycan
Peşə: Jurnalist, fotoreportyor, redaktor, veb developer
Dillər: Azərbaycan, Türk, Rus
Hazırkı vəzifə: Minval.Info baş redaktoru · TV Musavat baş efir rejissoru · "Yeni Müsavat" Media Qrupu - IT Support
Mükafat: Fotoqrafiya və media fəaliyyəti ilə bağlı onlarla sertifikat sahibidir / Azərbaycan milli mətbuatının 150 illiyi (1875–2025) yubiley medalı ilə təltif olunub
Layihələr: Fotoqraflar.info · rundizayn.com

Məhəmməd Meretgeldi oğlu Türkmən 17 oktyabr 1990-cı ildə Türkmənistanın Marı şəhərində anadan olub. Uşaqlığının bir hissəsi Marıda, bir hissəsi isə Azərbaycanın Salyan rayonunda keçib.

2011-ci ildən jurnalistikada çalışır. BakuNews, Kanal 13, Elitar.az kimi internet televiziyaları və bir sıra saytlar üçün reportyor işləyib. 2013-cü ilin oktyabrından “Yeni Müsavat” qəzetində fotomüxbir kimi fəaliyyətə başlayıb və həmin gündən bu yana Yeni Müsavat Media Qrupunun xüsusi müxbiridir.

Ekstremal şəraitlər və sosial mövzularda reportajlar hazırlayır. 2016-cı ildə “Ekstremal jurnalistlər üçün praktiki poliqon təlimləri”ndə iştirak edərək diplom alıb. Gərginliklərin və lokal döyüşlərin başladığı ilk günlərdən cəbhə bölgəsinə gedən jurnalistlərdən biri olub: Avqust döyüşləri, Aprel döyüşləri, Tovuz döyüşləri və 44 günlük Vətən müharibəsi.

2018-ci ilin yanvarında Minval.Info xəbər saytının baş redaktoru təyin olunub. 2019-cu ildən TV Musavat internet kanalının baş efir rejissorudur.

Jurnalistika ilə yanaşı fotoqrafiya ilə də məşğuldur. Fotoları müxtəlif müsabiqələrdə qalib gəlib, beynəlxalq media orqanlarında dərc olunub. 2016-cı ildə müəllifi və ideya qurucusu olduğu Fotoqraflar.info onlayn foto-təhsil və foto-xəbər portalını işə salıb.

2020-ci ildə Bakıda keçirilən brifinqdə “Davam” Ümumrespublika Gənclər Hərəkatının təsisçilərindən biri və İdarə Heyətinin üzvü olub. Hərəkatda Azərbaycanın gənc jurnalistlərini təmsil edib.

Son illərdə onlayn dələduzluq, maliyyə piramidaları və kibercinayətkarlıq mövzusunda araşdırmalar aparır. Bu araşdırmalardan biri “MoveShort” platformasının bağlanması ilə nəticələnib. “Any Unboxing” maliyyə piramidası ilə bağlı araşdırmasından sonra isə sxem ifşa olunub, sayt qapadılıb və rəhbərliyi həbs edilib. Hazırda Azərbaycanda bu sahədə araşdırma aparan yeganə jurnalistdir.

Azərbaycan milli mətbuatının 150 illiyi (1875–2025) yubiley medalı ilə təltif olunub.

Hazırda Bakıda yaşayır. Heç bir partiyanın üzvü deyil. Jurnalist Könül İbrahimlə ailəlidir, Nur adında qızı var.

Cəbhə bölgəsində işləmək mənim üçün fəxrdir.
Modern.az müsahibəsi, 23 oktyabr 2020

Karyera

Yol xəritəsi

2011-ci ildən bu günə qədər peşə yolunun əsas dayanacaqları.

2011

Jurnalistikaya başlayıb
BakuNews, Kanal 13, Elitar.az kimi internet televiziyaları və bir sıra saytlar üçün reportyor kimi çalışıb. Yerli və beynəlxalq jurnalistika təlimlərində iştirak edib.
Oktyabr 2013

“Yeni Müsavat” — fotomüxbir
“Yeni Müsavat” qəzetində fotomüxbir kimi fəaliyyətə başlayıb.
2014

Peşə fəaliyyətində çətinliklər
Məhkəmə qərarından sonra başlayan aksiyanı işıqlandırarkən saxlanılan dörd jurnalistdən biri olub; Mətbuat Şurasının müraciətindən sonra azadlığa buraxılıb. Peşə fəaliyyətini yerinə yetirərkən dəfələrlə saxlanılıb və hücumlara məruz qalıb. Hətta müharibə zamanı cəbhə bölgəsində fotoaparatı əlindən alınıb və qaytarılmayıb. Yüzlərlə reportaj, müsahibə və xəbər hazırlayıb.
Avqust 2014

Avqust döyüşləri — ilk cəbhə təcrübəsi
Cəbhə xəttində gərginliyin artdığı günlərdə döyüş bölgəsində işləyən azsaylı jurnalistlərdən biri olub.
Aprel 2016

Aprel döyüşləri · ekstremal jurnalistika təlimi
Aprel döyüşlərini cəbhə bölgəsindən işıqlandırıb. Həmin il “Ekstremal jurnalistlər üçün praktiki poliqon təlimləri”ni bitirərək diplom alıb və Azərbaycanda analoqu olmayan Fotoqraflar.info foto-təhsil portalını qurub.
Yanvar 2018

Minval.Info — baş redaktor
Yeni Müsavat Media Qrupunun tərkibində fəaliyyət göstərən Minval.Info xəbər saytının baş redaktoru təyin olunub.
2019

TV Musavat — baş efir rejissoru
TV Musavat internet kanalının baş efir rejissoru vəzifəsinə başlayıb. Universitetlərdə media və informasiya savaşı mövzusunda mühazirələrlə çıxış edib.
İyul 2020

Tovuz döyüşləri
Tovuz istiqamətində gedən döyüşləri işıqlandırmaq üçün ilk gündən orada olub. Günlərlə aktiv zonadan xəbərlər, reportajlar hazırlayıb.
Sentyabr–Noyabr 2020

44 günlük Vətən müharibəsi
Redaksiyanın ən təcrübəli müxbiri kimi müharibəni cəbhədən işıqlandırıb: Tərtər, Bərdə, Gəncə, Füzuli, Cəbrayıl, Zəngilan və Şuşa. Çəkdiyi fotolar beynəlxalq media orqanlarında dərc olunub.
2020

“Davam” Gənclər Hərəkatı
Bakıda keçirilən brifinqdə “Davam” Ümumrespublika Gənclər Hərəkatının təsisçilərindən biri və İdarə Heyətinin üzvü olub. Hərəkatda Azərbaycanın gənc jurnalistlərini təmsil edib.
2022–2023

Laçın yolundakı aksiya
Laçın yolunda keçirilən aksiyanı yerindən işıqlandırıb; həmkarları ilə birlikdə uzun müddət sahədə işləyib.
2025

Yubiley medalı
Azərbaycan milli mətbuatının 150 illiyi (1875–2025) yubiley medalı ilə təltif olunub.
2026

Araşdırmacı jurnalistika
Onlayn dələduzluq, maliyyə piramidaları və kibercinayətkarlıq üzrə araşdırmalar. “Any Unboxing” və “MoveShort” piramidaları ifşa olunduqdan sonra saytları bağlanıb, “Any Unboxing”in rəhbərliyi həbs edilib.

Sahələr

Nə iş görürəm

Peşəkar fəaliyyətimin əsas istiqamətləri.

01
Müharibə və böhran reportajı

Avqust döyüşləri, Aprel döyüşləri, Tovuz döyüşləri və 44 günlük Vətən müharibəsi. Atəş altında sahə işi, təhlükəsizlik protokolları, canlı yayın və hadisə yerindən reportaj.
02
Araşdırmacı jurnalistika

Maliyyə piramidaları, onlayn dələduzluq və kibercinayətkarlıq üzrə araşdırmalar. İfşalardan sonra platformalar bağlanıb, cinayət məsuliyyətinə cəlb olunanlar olub.
03
Fotojurnalistika

Sahə fotoqrafiyası və foto-reportaj. Çəkdiyim şəkillər müxtəlif müsabiqələrdə qalib gəlib və beynəlxalq media orqanlarında dərc olunub.
04
Redaktorluq və media idarəetməsi

Minval.Info-nun baş redaktoru kimi redaksiya rəhbərliyi: gündəlik planlama, komanda idarəçiliyi, redaktə standartları və onlayn nəşr prosesi.
05
İnternet televiziya və efir

TV Musavat-ın baş efir rejissoru. İnternet TV və IPTV yayımı, canlı debat və verilişlərin aparılması, studiya və sahə yayımı.
06
Təlim və ictimai fəaliyyət

Universitetlərdə media və informasiya savaşı mövzusunda mühazirələr, gənc jurnalistlər üçün təlimlər, “Davam” Gənclər Hərəkatında ictimai fəaliyyət.

Cəbhədən

Cəbhə xəttində

Cəbhə bölgəsi mənim üçün bir dəfəlik tapşırıq olmayıb. 2014-cü ilin Avqust döyüşlərindən başlayaraq, 2016-cı ilin Aprel döyüşlərində, 2020-ci ilin iyulunda Tovuz istiqamətində və nəhayət 44 günlük Vətən müharibəsində sahədə işləmişəm.

2020-ci ilin payızında redaksiya məni ən təcrübəli müxbir kimi cəbhəyə göndərdi. Bərdə və Gəncə raket zərbələri ən ağır günlər idi. Gəncədə zərbədən sonra küçədə qalmış balaca bir uşaq ayaqqabısını çəkdim — o fotonun arxasındakı ailə sağ qaldı. Füzulinin azad olunması mənim ad günümə düşdü; Şuşa isə yaddaşımda ən dərin iz buraxdı.

Cəbhəyə getməzdən əvvəl vəsiyyət yazmışdım. Kamera qarşısında və arxasında gözyaşlarımı saxlamağa çalışırdım, çünki işimiz baş verənləri görünən etmək idi.

Sonrakı illərdə də sahədən çəkilmədim: Laçın yolunda keçirilən aksiyanı da həmkarlarımla birlikdə yerindən işıqlandırdım.

Hətta vəsiyyət etmişdim, ölsəm ailəmə necə baxılacağı ilə belə maraqlanmışdım.
Modern.az müsahibəsi, 13 iyul 2021

Avqust döyüşləri 2014 · Aprel döyüşləri 2016 · Tovuz 2020 · Tərtər · Bərdə · Gəncə · Füzuli · Cəbrayıl · Zəngilan · Şuşa · Laçın yolu

Araşdırmalar

Maliyyə piramidaları və kibercinayətkarlıq

Araşdırmalarımın bir hissəsi. İfşalardan sonra bəzi platformalar bağlanıb, rəhbərliyi həbs edilib. Hazırda Azərbaycanda bu sahədə araşdırma aparan yeganə jurnalistəm.